ILOILO CITY – Ginpaidalom sa surgical lockdown ang Iloilo Terminal Market umpisa 12:00 kaina sang kaagahon para sa patigayunon nga disinfection.
Magalawig ang surgical lockdown sa merkado sa sulod sang 72 ka oras ukon tatlo ka adlaw.
Patigayunon ang sanitation bangud ginapalibutan ang merkado sang mga barangay kun sa diin nagapuyo ang iban sa 26 ka COVID-19 cases nga narecord sa Iloilo Fish Port Complex.
May kaangtanan diri, lain-lain nga mga reaksyon ang ginpabutyag sang mga market vendors.
Sa interview sang Bombo Radyo kay Maria Paz Domingo, alyas Apad isa ka manugbaligya sa lugar, iya ginpahayag nga pabor siya sa lockdown ilabi na agud mapakita ang disiplina sa mga tawo kag mapahangop ang pagsunod sa health protocol.
Nagaugtas si Domingo bangud madamo nga tawo sa merkado ang una na niya nakita nga wala nagasuksok sang face mask kag wala nagasunod sa physical distancing.
Sa sini nga lockdown, nagalaum ang natungdan nga makatuon ang mga tawo nga maghalong apang nagalaum man siya nga indi tuman ang mangin epekto sini sa ila tagsa ka palangabuhian.
