ILOILO CITY – Temporaryo nga ipasirado ang Iloilo Terminal Market umpisa Marso 29 tubtub Abril 11.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang temporary closure ang may katauyu-an nga hatagan sang ligwa ang pagpaninlo sa sulod sang merkado.
Suno kay Treñas, mismo ang Local Economic and Enterprise Office ang nagduso nga ipasirado anay ang nasambit nga merkado agud nga matinlu-an para sa kaayuhan sang manugbaligya kag manugbakal.
Sa pihak sini, ginpahayag ni Treñas nga ang mga manugbaligya ang mahimo nga makapahamtang sang baligya sa sagwa sang merkado agud nga indi maapektuhan ang supply sang pagkaon.
Kadungan sini, padayon man ang pag-disinfect sa tagsa ka distrito agud nga masiguro nga indi na maglapta ang virus kasunod sang pagsaka sa duha sang kaso sang Coronavirus Disease 2019 (COVID-19) sa syudad sang Iloilo.
