ILOILO – Ginsabat ni Iloilo Vice Governor Christine “Tingting” Garin ang mga pamangkot sang tawo kun ngaa manubo ang boto nga nakuha ni Iloilo 4th District Cong. Ferjenel Biron sa pagka gobernador sa probinsya sang Iloilo sa 1st district apisar nga lugar ini sang mga Garin.
Ini matapos nga nakakuha sang madamo nga boto si Vice Gov. Garin nga nangin running mate ni Biron sa premier distrito apang ang mamalidha ang napirde naman batuk kay Iloilo 3rd District Cong. Arthur Toto Defensor Jr.
Sa interview sang Bombo Radyo kay Vice Governor Garin, iya ginpahayag nga gintinguhaan nila sang iya nga pamilya nga kampanyahan si Biron apang wala na sila sang may mahimo pa bangud ang naluyagan sang mga pumuluyo sa premier distrito amo si Defensor.
Suno kay Garin, ginarespeto nila ang desisyon sang mayorya.
Samtang tuman naman ang pagpasalamat sang bise gobernador sa mga pumulyo humalin sa 1st district tubtob 5th district sang Iloilo sa padayon nga pagsalig sa iya apisar nga gamay lamang nga boto ang iya nakuha sa lugar sang mga Defensor ipaanggid sa boto nga nakuha sang iya nangin kasumpong nga si Barotac Viejo Mayor Niel ‘Beng’ Tupas III.
Nagakadapat man suno kay Garin nga mangin ehemplo sila ni Tupas bangud apisar nga magkasumpong sila sa pulitika, wala sila nga duha naghaboyanay sang isyu.
Ini bangud nga nagapangibabaw sa gihapon ang pag-abyanay sang duha.
