Ginkalipay ni Iloilo Vice- Governor Christine Garin nga natigayon nga maaprubahan ang 2019 annual budget sang probinsya nga nagabalor P3,645,412,733 sa diin P2,680,615,733 ang para sa general fund kag P964,797,000 para sa Local Economic Enterprise.
Sa interview sang Bombo Radyo Iloilo kay Vice- Governor Garin, iya ginpahayag nga resulta ini sang malawig nga binulan nga paghimay-himay sang executive kag legislative body sang Iloilo Provincial Government.
Suno sa bise-gobernador, apisar ginbuhinan ang approved budget nga mas manubo sang P66,840,000 sa orihinal nga proposed nga P3,712,252,733, makahulag sa gihapon ini kag klaro ang mga detalye sang pagakadtuan sang budget.
Nagpasalamat naman ang opisyal sa mga pumuluyo sang probinsya sa paghangop sa pagka-delay sang pag-apruba sang budget.
Matandaan nga Oktubre 2018 pa ginpasa ang budget apang nangin mahinay ang proseso sang pag-busisi sang Committee on Appropriations sa Sangguniang Panlalawigan sa pagpamuno ni Board member Dorothy Paes.
Gin-alegar nga ginpulitika ang pagpasar sang budget bangud kaalyado si Paes ni Cong. Ferjenel Biron nga nagpadalagan gobernador apang napierde kay Cong. Arthur “Toto” Defensor Jr. nga anak ni Iloilo Governor Arthur Defensor Sr.
