Iloilo – Natalana nga ipasaka sa second reading ang ginaduso nga provincial ordinance nga magahatag sang incentives sa mga topnotchers sa Bar examination kag iban pa nga national licensure examinations.
Ang Proposed Provincial Ordinance No. 2023-01-22 nga may tigulo nga
“An ordinance granting incentives to individuals who garnered the 10 highest places in the board examinations, bar examination, and other national licensure examinations” ang gin-author Iloilo Vice Governor Christine Garin, chairperson sang committee on education information sa Sangguniang Panlalawigan.
Sa interview sang Bombo Radyo kay Garin, iya ginpahayag nga pinaagi sa nasambit nga ordinansa, mas maengganyo ang mga examinees sa probinsya sang Iloilo.
Suno kay Garin, ang plano nga paghatag sang cash incentives sa mga makasulod sa Top 10 sa pasinawan ang reward sa kabudlay nga gin-agyan sang mga indibidwal sa ila nga pag-review antes ang examination.
Ginpanan-aw nga mapa-in sang P500,000 ang provincial government para sa ginaduso nga ordinansa.
Para sa Physician Licensure Examination kag Bar Examination, yari ang mga mahimo nga mabaton:
- Top 1 – P40,000
- Top 2 to Top 5 – P20,000
- Top 6 to Top 10 – P15,000
Sa iban naman nga Professional Regulation Commission examination, mahimo mabaton ang mga masunod:
- Top 1 – P20,000
- Top 2 to Top 5 – P15,000
- Top 6 to 10 – P10,000
Ang incentive committee amo ang in charge sa validation kag identification sang beneficiaries sang cash incentives kag ini ang ginalakipan sang gobernador, bise gobernador, pinuno sang Human Resource Management and Development Office kag chairperson sang committee on education and information sa Sangguniang Panlalawigan.
