Nangin madinuagon kag napuno sang kasanag kag kasadya ang ILOmiNATION Philippine Light Festival sang Iloilo Dinagyang Festival 2025.
Sa interview sang Bombo Radyo kay Iloilo City Mayor Jerry Treñas, iya ginpahayag nga ini ang nagpakita sang pagtililipon sang mga nagapanguna nga light festivals sang pungsod bilang kabahin sang tuigan nga selebrasyon sang Dinagyang Festival 2025.
Suno kay Treñas, ang magadaog subong nga tuig ang magabaton sang grand prize nga P500,000.
Nagpaindis-indis ang mga grupo sang Pandang Gitab, ang opisyal nga kapiestahan sang Oriental Mindoro; Pavvurulun Afi Festival sang Tuguegarao City, Cagayan; Tanglawan Festival sang San Jose del Monte, Bulacan; Hermosa Festival sang Zamboanga City; kag Bailes de Luces Festival sang La Castellana, Negros Occidental.
Ang ILOmination champion sang nagligad nga tuig nga Tribu Sidlangan ang nagpasundayag bilang bisita, kaupod ang Iloilo’s Banaag Festival gikan sa Anilao, ang nagaisahanon nga light festival sang probinsya.
Nahibaluan nga ini na ang ika-duha nga tion sang nagsugod ang amo nga kompetisyon sang 2023 pagkatapos sang pandemya, nga nagasimbulo sang kasanag pagkatapos sang kadulom.
