ILOmination Philippine Light Festival sang Iloilo Dinagyang Festival 2025, pasakopan sang 5 ka mga national festivals
Nakatalana nga maghatag sang kasanag sa mga tumalan-aw paagi sa pinakaulihi nga innovation sang ILOmination Philippine Light Festival sang Iloilo Dinagyang Festival 2025.
Ini ang magapakita sang pagtililipon sang mga nagapanguna nga light festivals sang pungsod bilang kabahin sang tuigan nga selebrasyon sini.
Sa interview sang Bombo Radyo kay Elvert Bañares, Director for arts and culture initiatives sang Iloilo Festivals Foundation, Inc. (IFFI), iya ginpahayag nga nagpadala sang imbitasyon si Iloilo City Mayor Jerry Treñas kag positibo ang sabat sang lima ka mga festivals.
Magabuylog sa paindis-indis ang mga grupo sang Pandang Gitab, ang opisyal nga kapiestahan sang Oriental Mindoro; Pavvurulun Afi Festival sang Tuguegarao City, Cagayan; Tanglawan Festival sang San Jose del Monte, Bulacan; Hermosa Festival sang Zamboanga City; kag Bailes de Luces Festival sang La Castellana, Negros Occidental.
Suno kay Bañares, ang ILOmination champion sang nagligad nga tuig nga Tribu Sidlangan ang magapasundayag bilang bisita, kaupod ang Iloilo’s Banaag Festival gikan sa Anilao, ang nagaisahanon nga light festival sang probinsya.
Ang ILOmination nagsugod sang 2023, pagkatapos sang pandemya, nga nagasimbulo sang kasanag pagkatapos sang kadulom.
Nahibaluan nga ang ILOmination Philippine Light Festival, nga nagakompleto sa Kasadyahan sa Kabanwahanan ang may grand prize nga P500,000.
