ILOILO CITY – Nakasulod sa Top 10 sang ginpagwa nga 2016 Bar Examinations ang isa ka Ilongga beauty queen.
Ini amo si Allana Mae Babayen-on sang Brgy. Belen, Banate, Iloilo.
Si Babayen-on ang nagtapos sang iya pre-law sa West Visayas State University sa kurso nga Bachelor of Arts in Political Science sa diin nagtapos ini bilang Magna Cum Laude kag graduate sang Bachelor of Laws sa University of San Agustin College of Law sa diin ini ang Top of the Class.
Si Babayen-on ang nagpang-apat sa mga Bar topnotcher kag may average nga 88.75 percent.
Ginpabugal man sini nga tanan nga mga nakasulod sa Top 10 ang naghalin sa mga provincial schools.
Ginpamatud-an naman ni Babayen-on nga ini ang “beauty and brain” sa diin ginkoronahan ini bilang Mutya ng Banate kag consistent honor student.
Ginpasalamatan man sini ang iya pamilya, mga abyan kag boyfriend nga amo ang nangin inspirasyon sini sa iya kadalag-an.
Nahibaluan nga sa 6,344 nga nagkuha sang Bar Exam, 59.06 percent lang ukon 3,747 ang mga nakapasar.
Lakip sa mga subjects sa pasinawan amo ang Political Law, Civil Law, Criminal Law, Remedial Law, Taxation, Mercantile Law, Labor Law kag Legal and Judicial Ethics.
Nakuha naman ni Karen Mae Calam sang University of San Carlos ang no. 1 spot sa Bar Examinations.