ILOILO CITY – Trending sa social media ang isa ka Ilongga designer matapos ginrampa ang gindisenyo sini sa Paris, France.
Ginpasuksok ni Audrey Rose D. Albason sa iya mga modelo ang iya collection nga ginatawag “Gugma” sa Paris leg sang Oxford Fashion Studio (OFS).
Ang 32-anyos nga iloy nga tumandok sang Dumangas, Iloilo ang kilala sa iya “feminine-eccentric” style.
Ang mga disenyo sini ang nagpabilib sa OFS, nga isa ka UK-registered company nga amo ang sa likod sang mga fashion shows sa Paris, New York, London, kag Oxford.
Ang collection ni Albason ang inspired sa Visayan landscape sa diin makit-an ang mga contemporary designs nga baybay, suba kag busay.
Makit-an naman sa mga disenyo sini ang mga handcrafted details kag embellishments nga may korte nga dahon sang anahaw kag ilang-ilang.
Si Albason ang isa ka nurse sa diin nag-graduate ini sa Central Philippine University sa Jaro, Iloilo City antes nagsulod sa fashion industry.
Ginbayaan sini ang iya medical profession kag nagtuon sa Fashion Institute of the Philippines.
Ini ang gin-train man sang bantog nga designer for the stars nga si Francis Libiran.