ILOILO – Magatiglawas sang Pilipinas ang isa ka Ilongga para sa World Championships of Performing Arts (WCOPA) sa Anaheim, California sa Hulyo 28 tubtob Agosto 6, 2023.
Sa interview sang Bombo Radyo kay Francine Russia, tumandok sang Miag-ao, iya ginpahayag nga magapasakop ini sa hip hop, jazz, kag open category ukon kombinasyon sang mga dance styles.
Suno kay Russia, sa edad nga 4 years old, nadiskubrehan na sini ang talento sa pagsaot nga nangin palaagyan agud magpasakop sa nanuhay-tuhay nga mga dance competitions.
Nahibaluan nga isa si Russia sa anum ka mga Ilonggo performers nga ipadala agud itiglawas ang Pilipinas sa international stage.
Ang World Championships of Performing Arts ukon “Talent Olympics” ang isa ka bantog nga international competition nga ginapasakupan sang mga aspiring performers kag entertainers nagikan sa 70 ka mga pungsod.
