Produkto sang Iloilo ang bag-o nga Philippine ambassador to the Holy See nga si Myla Grace Ragenia Catalbas Macahilig.
Sang nagligad lang nga Nobyembre 20, gin-presentar na ni Macahilig, 55, ang iya nga credentials kay Pope Francis sa Vatican.
Dala ni Macahilig sa iya pag-atubang sa Santo Papa ang sculpture ni St. Lorenzo Ruiz, ang first martyr sang Pilipinas.
“It was a bit intimidating because you are talking to Pope Francis. As Filipinos, we value him as a person and him as a leader of the church. At the same time, it was exhilarating to be representing the Philippines to him,” suno sa ambassador. “What I can confirm is that he has a very strong affection for the Philippines and the Filipino people, and he loves being called Lolo Kiko actually.”
Ginpakigbahin ni Macahilig nga may private meeting sila sang Santo Papa — isa ka makahulugan nga tion para sa iya bangud kabahin lang siya sang una sang general audience sa misa sa St. Peter’s Basilica kun may special trips sila sa Roma.
Si Pope Francis ang nakabisita na sa Pilipinas sang 2015. Sang nagligad lang nga Marso 14, ginpangunahan niya ang misa sa St. Peter’s Basilica para sa 500th anniversary sang pag-abot sang Kristyanismo sa Pilipinas.
‘PRODUKTO GID SANG ILOILO’
Nabun-ag sa Tagum City, Davao del Norte si Macahilig apang nagdaku gid ini sa banwa sang Pavia kag diri man nakatapos sang iya pag-eskwela sa Iloilo.
Nagtapos si Macahilig sa fisheries science, management, economics and diplomacy, kag nakatrabaho sa aquaculture projects sa state financial structure sa Pilipinas.
Sa sulod sang 23 ka tuig, nagpangalagad ini sa Department of Foreign Affairs (DFA). Nagpungko siya bilang former DFA Assistant Secretary sa financial management services.
Nangin Vice-Consul siya sa Philippine Embassy sa New Zealand sa sulod sang anum ka tuig, Consul kag Deputy Consul General sa London, United Kingdom sa sulod sang anum man ka tuig, kag Director sa Southern Europe Division sa Ministry of Foreign Affairs (MFA).
Sang Hunyo 4, 2021, gin-appoint siya sang bicameral Commission on Appointments bilang new Ambassador Extraordinary and Plenipotentiary to the Holy See nga may concurrent jurisdiction sa Sovereign Order of Malta.
Ang iya assignment sa Holy See amo man ang iya “first posting as ambassador.”
‘DIFFERENT CHALLENGE IN ITSELF’
Espesyal ini nga tion para kay Macahilig bangud subong nga 2021 amo ang ika-70 nga tuig sang pag-establisar sang diplomatic relations sa tunga sang Pilipinas kag sang Holy See.
Ang 70th anniversary sang relasyon sang pungsod kag sang Holy See ang kadungan man sang pag-selebrar sang 500 years of Christianity sa Pilipinas.
Apisar ginapabaloran gid niya ang iban nga mga assignments antes ang iya designation sa Holy See, ginpahayag sang Ilongga nga may iban gid nga elemento ang iya pagpadulong bilang ambassador sa See of Rome ukon Apostolic See bangud jurisdiction ini sang Santo Papa.
May dugang man ini nga ‘personal meaning’ para kay Macahilig bangud isa man siya ka Katoliko kag bangud man sa malawig nga maragtas sang Pilipinas kag sang Kristyanismo. ##
