ILOILO – Bugal sang Iloilo ang isa sa mga umpires sa badminton sa nagapadayon nga 2020 Tokyo Olympics, the Greatest Show on Earth.
Ini amo si Dr. Ma. Janelyn Fundal, tumandok sang Parara Norte, Tigbauan, Iloilo, pinuno sang Iloilo Sports Development and Management Office, kag isa man ka Badminton World Federation (BWF) certificated umpire.
Sa interview sang Bombo Radyo kay Fundal, iya ginpahayag nga 43 sila nga umpires nga halin sa lain-lain nga pungsod sa kalibutan.
Si Fundal lang ang nagaisahanon nga umpire halin sa Pilipinas.
Sang 2016, napilian man si Fundal bilang labing-una nga Filipina nga nag-officiate sa hampang sa badminton sang Rio Olympics sa Rio de Janeiro sa Brazil.
Pagkatapos sang tournament sa Tokyo, Japan, magabalik man si Fundal sa Iloilo agud tungdan ang iya mga obligasyon bilang pinuno sang Iloilo Sports Development and Management Office.
Bisan ang mga technical officials sa Olympiada subong nga tuig ang nabudlayan kag nasubuan man maglantaw sang set-up sang mga hampang.
Suno kay Fundal, hotel kag venue lang gid ang sarang mapalapitan sang mga games officials.
Ginadumilian man sila nga magsulod sa playing venue kun wala man sila sang duty.
Indi kaangay sa festive vibe sa Rio 2016 Olympics sa Rio de Janeiro sa Brazil, tuman kadamo sang restrictions sa Tokyo, Japan suno kay Fundal bangud sa emergency alert tuga sang COVID-19 pandemic.
Sa pagkamatuod suno sa iya, wala pa siya nakasugata sa isa sa delegasyon sang Pilipinas subong nga 2021.
Pagkatapos sang tournament sa badminton sa Musashino Forest Sport Plaza sa Chōfu, Tokyo, indi na pwede nga makapabilin pa ang mga technical officials bangud may ginpirmahan sila nga kasugtanan nga magpauli na sa ila tagsa ka pungsod.
