ILOILO CITY – Tuman nga kalipay ang nabatygan sang isa ka Ilongga nga manunudlo matapos nadala sa Top 12 finalist sang Bombo Music Festival 2020.
Sa exclusive interview sang Bombo Radyo kay Lindy Catequista sang Magsaysay Village, La Paz, Iloilo City kag composer sang ambahanon nga Break, iya ginpahayag nga halos indi niya mapaathag ang iya nabatyagan matapos nalakip sa Top 12 finalist kaupod ang iban pa nga composers sa pungsod.
Suno kay Catequista, nangin inspirasyon niya sa paghimo sang ambahanon nga Break amo ang wala sang pahuway nga paggamit sang social media sang mga pamatan-on subong nga henerasyon.
Kinahanglan suno kay Catequista nga may yara man sang pahuway ang paggamit sang social media.
Kaupod man niya sa paghimo sang nasambit nga ambahanon ang iya bana nga si Marty Catequista nga nangin isa man sa mga semi-finalist kag si Ramy Capuyan sang Quartero, Capiz nga isa man sa mga semi-finalist.
Nahimo nila suno kay Catequista ang nasambit nga ambahanon sang ginpatigayun ang Bombo Music Festival workshop sadtong Hunyo 2, 2019.
Ginbululigan man nila sa paghimo ang lyrics lakip na ang melody sang ambahanon nga Break.
Sa subong, todo na ang iya nga pagpanghanda para sa finals night sang Bombo Music Festival 2020 nga pagahiwatun sa Enero 11, 2020 sa syudad sang Iloilo.
