PASSI CITY – All set na ang tiglawas sang Western Visayas sa Singing Cops Philippines 2024.
Ini amo si Police Staff Sergeant Jo-Nah Belle Arcenal, tumandok sang Población Ilawod Passi City kag Assistant Operations Police Non-Commissioned Officer (PNCO) sa Passi City Police Station.
Si Arcenal ang isa man ka licensed teacher kag ginkoronahan man bilang Bb. Pintados de Passi 2009 kag nagtiglawas sang Passi City sa Miss Earth Philippines 2009.
Sa interview sang Bombo Radyo kay Arcenal, iya ginpahayag nga kinder pa lang siya, nag-umpisa na siya sa pagkanta tubtob nga nakahiligan na niya ini.
Suno kay Arcenal, nagalaom siya nga madala pauli ang titulo sa finals nga patigayunon sa Byernes, Setyembre 27 sa Music Museum sa San Juan, Metro Manila.
Nahibaluan nga nakuha man ni Arcenal ang ikaduha nga pwesto sa Preliminary Judging sa kompetisyon nga ginpatigayon sang Setyembre 12 sa Directorate for Police Community Relations Office sa Camp Brigadier General Rafael Crame, Quezon City.
Nahibaluan nga ini ang pinakauna nga kahigayunan nga magapatigayon ang Philippine National Police sang nasambit nga kompetisyon.
Sa interview sang Bombo Radyo kay Police Lt. Col. Atty. Benjo Clarite, hepe sang Passi City Police Station, ini ang isa ka maayo nga paagi agud mapakita ang positibo nga aspeto sang mga pulis.
Ginpahayag sini nga ang nasambit nga kompetisyon ang makapamatuod nga ang mga pulis ang wala lang nagapatuman sang layi kundi abyan man sang komunidad.
