UAE – Ginakabig sang isa ka iloy kag Overseas Filipino Worker nga ika duha na nga kabuhi ang pagkaluwas sa Coronavirus Disease 2019 (COVID-19).
Sa Good Morning Philippines program, ginpahayag ni Sheila May Perez, nagatrabaho sa isa ka bangko sa United Arab Emirates, nga tuman ang iya nga pagpasalamat sa ika duha nga kabuhi nga ginhatag sa iya matapos natapikan sang virus.
Suno kay Perez, Marso 28 sang nag-umpisa ang iya pagbatyag sang ubo kag pagsakit sang likod tubtub nga sang Abril 12, nakumpirma nga may yara siya sang COVID-19.
Magluwas sa kahangawa para sa iya kabuhi, nagakahangawa man si Perez para sa seguridad sang iya pito ka tuig nga anak kag para man sa iya bana.
Antes pa man siya na-admit sa hospital, ginpahayag ni Perez nga nag-inom siya sang luy-a nga ginpabukalan sa tubig agud nga mahagan-hagan ang iya ginabatyag nga pagsakit sang iya likod, joints, nagapin-ot ang pagginhawa, nagasakit ang ulo kag nagabatyag sang init sa lawas.
Sang pag-abot niya sa hospital, didto niya nasaksihan kag nahibalu-an kun daw ano ka seryoso ang krisis sa United Arab Emirates kun sa diin madamo nga mga pasyente ang nagahulat sang medical treatment.
Nagapasalamat si Perez bangud sa iya madasig nga pag-ayo kag gilayon nga nakapauli sa ila balay.
Sa pihak sang pagpanghangkat nga iya naagyan, ginpahayag sang natungdan nga daku ang nabulig sang moral support sang iya pamilya.
