Passport kag rosarito lang gid ang nabitbit sang isa ka Ilongga overseas Filipino worker (OFW) sang nagdali-dali ini nga makapalagyo sa nasunog nga Wang Fuk Court housing complex sa Tai Po, Hong Kong sang Nobyembre 26.
Suno kay Jessica Sampiano, tumandok sang Siwalo, banwa sang Maasin, duha lang sila sang iya apat ka tuig nga alaga sang adlaw nga natabo ang sunog. Naga-istar sila sa ika-31 nga panalgan sang building.
Nagakatulog ang bata samtang nagapanglimpyo naman si Jessica sang napanimahuan sini ang aso.
Paathag sini, bisan nagasinggitan pa, naga-ginamo, ukon nagakalayo sa guwa sang high-rise apartment complex, wala gid siya sang makita bangud nakaputos sa bamboo scaffolding kag green net ang palibot sang ila ginatiniran nga building bangud nagapadayon ang renovation works.
Indi naman makasaka ang iya employer bangud ginapunggan sang mga awtoridad nga may makasaka sa building agud indi na madugangan ang posible nga ma-trap.
Maayo lang suno kay Jessica bangud natalupangdan sini ang iya telepono kag didto napahibalo sang iya employer nga dapat magpanaog na bangud sa kadakuon sang kalayo.
Dali-dali sini nga ginpukaw ang bata, gindal-an sang jacket, kag ginbulsa ang iya passport samtang nagatinguha nga makaguwa sa lugar. Pahayag ni Jessica, tuman ang iya kakulba ilabi na sang naghuni na ang alarm kag tatlo ka beses pa sini kinahanglan nga itulod ang puertahan.
“Hambal ko, Lord, bahala ka na sa amon. Kung mapatay man lang ang alaga ko, bahala na, pati man ako eh. Unungan ko na lang gid sa,” suno kay Jessica. Magluwas sa passport, rosarito lang gid ang unod sang bulsa sang Ilongga sang amo nga tion nga amo ang nangin salandigan niya sa mabudlay nga tion.
“Pagguwa ko sa pirtahan, maayo lang nagbukas ang lift, pero actually, kung mag-alarm na, ma-stop na ina [ang elevator],” paathag sini kun paano sila nakaguwa. Sang amo nga tion suno sa iya, handa na siya nga manghagdan sila kuntani agud lang makaluwas.
“Ginhakos ako ni amo [sang nagkit-anay na kami] kag gapasalamat nga naluwas ko ang bata. Ang itsura ni amo, indi ma-drawing kun mahibi o makadlaw,” panugiron ni Jessica. “Kadasig lang, wala lang isa ka minuto [sang pagguwa namon], nag-ibwal na ang building namon. Indi ko maintindihan ang nabatyagan ko. Daku ang pasalamat ko. Bisan ano wala gid ko may nadala,” dugang sini.
Sa subong, temporaryo nga nagatinir sanday Jessica sa balay sang abyan sang iya employer.
“Amo na hambal sang alaga ko, pirme niya ginahambal sa akon. Ginahakos ya ako, ‘Don’t worry, Auntie, we are safe’,” pahayag sini.
Nagapasalamat man siya sa tanan nga nagbulig sa iya kinahanglanon lakip na ang iya mga kaupdanan sa simbahan amo man sa Philippine Consulate, Overseas Workers Welfare Association (OWWA), asosasyon sa Maasin, kag iban pa.
“Sa mga kasimanwa ko, indi kamo magkabalaka. May trauma pa nga gamay, pero, okay lang, at least, nakaluwas man. Ang kaluluoy dira amo ang mga biktima nga wala pa makita… masakit,” suno sa Ilongga OFW samtang nagahilibion.
Sandig sa Hong Kong authorities, nagsaka na sa 151 ang patay sa amo nga sunog matapos nakit-an ang iban nga mga bangkay sa hagdan kag mga rooftop. 13 naman ka tawo ang gindakop bangud sa suspected manslaughter. Nagapadayon pa ang imbestigasyon.#
