ILOILO CITY – Ginpasiguro sang Overseas Workers Welfare Administration (OWWA) nga hatagan sang atensyon ang kaso sang Pinay worker nga apat ka tuig na nga nadula sa Saudi Arabia.
Sa interview sang Bombo Radyo Iloilo, ginpahayag ni OWWA administrator Hans Leo Cacdac nga karon nga nalubong na si Joanna Daniela Demafelis, ang Ilongga OFW nga ginpatay sang iya mga amo sa Kuwait, ila naman hatagan sang atensyon ang kaso ni Dorothy Blancaflor sang Lemery, Iloilo.
Magatipon sila sang impormasyon angot kay Blancaflor agud mahibaluan ang sitwasyon sini sa Saudi Arabia.
Indi na dapat masulit suno kay Cacdac ang natabo kay Demafelis.
Nahibaluan nga nagpadulong na sanday Cacdac kag OWWA deputy administrator Arnell Ignacio sa puluy-an ni Blancaflor agud makakuha sang impormasyon angot sa Ilongga OFW.