Yara na subong sa deportation area sa Kuwait ang isa ka Ilongga Overseas Filipino Worker (OFW) nga napreso bangud sa ginapahayag nga paglapas sa Labor Law sang amo nga pungsod.
Ginkilala ini kay Maricris Lapatero Sacatin, residente sang Poblacion, San Rafael, Iloilo kag 13 na ka tuig nga naga-ubra bilang domestic helper sa luwas sang pungsod sa isa lamang ka employer.
Sa interview sang Bombo Radyo kay Maeb Lapatero, utod ni Maricris, iya ginpahayag nga nagapasalamat gid sila bangud bisan paano, may development na sa kahimtangan sang ila utod sa Kuwait matapos nga gindangop nila ang ila problema diri sa Bombo Radyo.
Apang, indi sa gihapon nila mapunggan ang magkabalaka bangud wala sa gihapon sang direkta nga komunikasyon sa ila utod.
Gintuad man sang natungdan nga nagpromisa ang amo ni Maricris nga siya ang mabayad sang plane ticket sini kag ipadala ang nabilin nga gamit sini sa Pilipinas.
Madumduman nga nalapas sang amo nga Ilongga ang Labor Law sang Kuwait bangud nagaubra ini bilang part-time cook sa negosyo mismo sang iya amo nga ginapahayag nga wala sang nagakaigo nga permiso.
