CAMBODIA – Ang pagkadula sang iya trabaho kag pagkaubos sang savings sang pinay English teacher sa pungsod Cambodia ang nagtulod sa iya sa pag-umpisa sang isa ka food business.
Sa exclusive interview sang Bombo Radyo sa Ilongga nga si Tiffany Marie Jamabay Realis, direkta sa Cambodia, iya ginpahayag nga daw kaangay nga nadulaan na siya sang paglaom sang nagsirado ang iya ginatudluan nga eskwelahan sang Marso bangud sa Coronavirus disease 2019 (COVID-19) pandemic.
Ginpahayag ni Realis nga matapos nagpositibo sa COVID-19 sang isa ka canadian nga manunudlo sa ila pungsod, gilayon nga ginmando ni Cambodian prime minister Hun Sen ang pagpasirado sang tanan nga mga eskwelahan.
Suno kay Realis, sa renta pa lang sang gina-istaran nga balay kag mga balayran, indi bastante ang ginakita sang iya bana nga factory worker.
Agud mabuhi, naisipan ni Realis nga maghimo sang atsara kag iban pa nga mga Filipino food sa diin gamay lang ang capital sini.
Halin sa 30 ka jars kada adlaw, ginpahayag sang natungdan nga madamo na sang mga luyag mag-resale sang iya atsara sa diin mahimo ini mabakal sa P70 kada garapon.
Magluwas sa atrasa, nagahimo man sila sang iban pa nga mga pinoy food kaangay sang ginamos, salted egg, kwek-kwek, peanut butter, skinless longganisa, linugaw, chili paste, spaghetti kag fresh lumpia.
