Ginpakigbahin sang Ilongga nga manunudlo sa Guam ang iya nabatyagan matapos ginhatagan ni United States President Joe Biden sang Presidential Award for Excellence in Mathematics and Science Teaching.
Ini amo si Dianne Hope Tormon West nga tumandok sang Población, Maasin, Iloilo.
Si Tormon West ang nagaserbe man nga international correspondent sang Bombo Radyo Iloilo.
Si West ang nagatudlo sa Okkodo High School sa Guam sa sulod na sang pila ka tuig.
Suno kay West, dako nga blessing para sa iya nga mangin recipient sang isa sa pinaka-prestihiyoso nga pagpasidungog para sa mga manunudlo sa USA.
Si West ang nalakip na subong sa 15 ka mga manunudlo nga halin sa Guam nga nakabaton sang sini nga pagkilala humalin sang una.
Nahibaluan nga 336 tanan ka mga educators sa Estados Unidos ang nakabaton sang presidential award for excellence in STEM education.
Pahayag ni West, inspirasyon niya ang iya kaugalingon nga eksperyensiya kun sa diin madamo man ang nahikay sa iya sang una bilang isa ka dumuluong sa Guam apang gin-gamit niya ini agud mag-improve pa bilang manunudlo.
Suno sa iya, ini man ang luyag niya ipalab-ot sa iban nga mga kabataan nga nagahandom apang ginapunggan bangud sa kahadlok sa pagpakanubo sang iban, nga gamiton ini agud labi pa nga magpanikasog kag magpaninguha agud nga magmadinalag-on kag sa ulihi, mangin inspirasyon man sa iban.
Ginahalad naman ni Tormon West ang pagpasidungog nga iya nabaton para sa iya pamilya kag sa tanan nga tawo nga nagsalig sa iya.
