Ginhimo nga inspirasyon sang gold medalist sa 30th Southeast Asian Games, Tunggal Pencak Silat nga si Edmar Tacuel sang Nagba, Tubungan, Iloilo ang iya mga inagyan sang una antes nalab-ot ang iya handum subong.
Sa exclusive interview sang Bombo Radyo kay Tacuel, iya ginpahayag nga sang siya ang naga eskwela sa high school sang una, mabudlay para sa iya nga i-manage ang oras sa pag-eskwela, training kag obligasyon sa ila balay.
Suno sa iya, matapos ang klase, naga diretso siya gilayon sa training kag matapos ini, nagapadulong siya sa ila kaumhan agud nga mamugo pa sang karabaw.
Apisar nga makapoy para kay Tacuel ang na eksperyensyahan niya sadto, ini ang nagtulod sa iya nga mangin maayo nga atleta sa patag sang Pencak Silat.
Antes pa man nag umpisa ang performance ni Tacuel sa Tunggal Pencak Silat, nakabatyag siya sang gamay nga kulba apang iya ini ginpakigbatu-an agud nga mahatag ang maayo nga performance para sa Pilipinas.
Makapila man ka beses nagpangamuyo si Tacuel antes nag-umpisa ang Tunggal Pencak Silat.
Sa walo ka mga performers, ika-pito si Tacuel nga nag perform sa diin samtang nagalantaw siya sang performance sang iban nga pungsod, nagasulod na sa iya paminsaron nga masarangan sini nga lutuson ang iya mga kontra.
Dako man ang nabulig sang hinugyaw, palakpak kag suporta sang mga Pilipino sa Ilonggo athlete rason nga mas nag mag-an ang iya balatyagon samtang naga perform.
Nakatatak mismo sa paminsaron ni Tacuel nga indi niya pagpakahuy-an ang pungsod.
Sa subong, tuman ka malipayon si Tacuel sa nahatag nga dungog sa Pilipinas.
Indi pa mapat-od sang Ilonggo athlete kun bala madayon ang international event nga iya paga-intrahan sa China sa Disyembre 26.
Nagpangabay man siya sa mga pumuluyo sa Iloilo nga padayon nga suportahan ang iban pa nga Ilonggo Athletes bangud kinahanglan nila ini agud nga mas manami ang mangin performance.
Panugyan ni Tacuel sa mga kabataan, mag pursige lang sa luyag nga malab-ot sa kabuhi, himuon inspirasyon ang mga na-agyan nga pagtilaw kag indi pagkalimtan nga magpangamuyo sa Diyos.
