ILOILO CITY–Emosyonal nga gindumdum sang isa ka director/ film maker ang pagtaliwan sang multi-awarded choreographer nga si Edwin Duero.
Sa interview sang Bombo Radyo kay Elvert Bañares, iya ginpahayag nga ginkakibot man niya ang natabo nga pagtaliwan sang iya abyan.
Suno pa kay Bañares, masubo ang natabo bangud dako nga kadulaan sa Western Visayas ang pagtaliwan ni Duero ilabi na sa patag sang Dinagyang Festival.
Pahayag pa ni Bañares, daku ang nabulig sa iya sang nagtaliwan nga multi-awarded choreographer bangud nahatagan siya sang kahigayunan nga mangin isa ka commentator.
Nagalaum man man si Bañares nga ang legasiya nga  ginbilin ni Duero ang magapadayun kag mangin inspirasyon sang tanan.
Madumduman nga si Duero ang creator sang Dagyaw Theater nga dance company sa sulod sang malawig nga tinuig kag nagdala sang grupo nga makaperform sa nagkalain-lain nga pungsod sa kalibutan.
Magluwas diri, nangin trainer man si Duero sang Tribu Bola-bola nga nangin champion sa mga nakaligad nga Dinagyang Festival.
Samtang, masinadyahon nga tawo ang nagtaliwan nga multi awarded choreographer nga si Edwin Duero.
Sa interview sang Bombo Radyo kay Evelyn Duero, utod ni Edwin, iya ginpahayag nga masinadyahon kag maayo maghatag snag panugyan ang iya napatay nga utod.
Nagalaum si Evelyn nga indi malipatan sang publiko ang iya utod.
Nasapwan na lang sa iya kwarto kag wala na sang kabuhi ang multi-awarded choreographer.