ILOILO CITY – Para sa tanan nga mga tawo ang Dinagyang Festival, kag indi para sa makasarang lang.
Ini ang pahayag ni Joseph William Albaño, Arts Management and Cultural Works specialist, kag isa sa mga mabaskog nga nagduso kaupod sa Iloilo Festivals Foundation Incorporated (IFFI) nga ‘ibalik ang selebrasyon sa komunidad kag sa publiko.’
Subong nga tuig, liwat nga naka-perform ang mga old barangay tribes nga ginalakipan sang Tribu Sagasa, Familia Sagrada, Anggola, Canyaw, Hamili, Panaad, Aninipay, Molave, kag Parianon.
“It is the people’s festival, indi ni sya para sa mga turista nga makasarang magbayad kag maglantaw sa Freedom Grandstand,” pahayag ni Albaño.
Dugang pa sang natungdan, nagakadapat gid lang nga ibalik ini sa mga Aeta communities.
“A festival is nothing without community engagement in the real sense of the word. The essence of a festival is celebrating the lives of the people (as “ati” is not our culture–it is not authentic, so to speak) who should not merely be spectators, but ‘owners’ of the festival,” dugang ni Albaño.
Ginkadismaya man ni Albaño nga kaina, may mga reklamo nga nagtuhaw bangud wala ginpa-intra sa streetdancing ang mga tawo nga naglantaw kag nagsuporta sa ila mga naluyagan nga tribu.
Kaina, sa interview sang Bombo Radyo kay Atty. Jobert Peñaflorida, presidente sang IFFI, iya ginpahayag nga gilayon man nila nga ginsolusyunan ang nasambit nga problema sa diin ginpakakas nila ang tanan nga lubid nga nagabangga sa mga tumalan-aw nga mag-upod sa merrymaking.
“That is a good thing. Kay para gid ni sa mga tawo ang kinasadya,” sabat ni Albaño, nga nagpakigbahin pa nga may yara siya sang mga kilala gikan sa luwas sang pungsod nga nagkadto gid sa syudad para sa amo nga merrymaking.
Kaangot naman sa performance sang mga tribu sa highlight sang Dinagyang Festival bwas, Enero 26, ginalauman sang natungdan nga ‘more energized’ pa nga warriors ang iya masaksihan.
