ILOILO CITY – Bugal para sa isa ka Ilonggo Dance Group nga itiglawas ang Pilipinas sa World Supremacy Battlegrounds dance competition nga patigayunon sa Australia.
Sa interview sang Bombo Radyo kay Fritz Leroy Dapilo, isa sa mga katapo sang dance group nga Headz Up, iya ginpahayag nga wala nila ginlauman nga mahatagan sila sang kahigayunan nga itiglawas ang Pilipinas sa patag sang pagsaot.
Sang nagligad nga Abril 6, nangin first runner-up ang ila grupo sa World Supremacy Battlegrounds Visayas Leg Monster Division nga ginhiwat sa Cebu City.
Sa nasambit nga aktibidad, may yara sang nagkalain-lain nga kategorya sa diin magluwas sa Headz Up, may iban pa nga Ilonggo Dance Group nga makapakigbahin sa World Supremacy Battlegrounds nga patigayunon sa Australia.
Ang World Supremacy Battlegrounds sa Australia ang patigayunon sa Oktubre 4 tubtub 6 kag may kaangtanan diri, nagahingyo man ang grupo sang suporta ilabi na sa pinansyal nga aspeto.
Sa pihak sang mga pagpanghangkat, desidido ang grupo nga magdaug sa dance competition agud nga makahatag sang dungog sa Iloilo kag ilabi na sa pungsod Pilipinas.
