ILOILO CITY – Nagalaum ang Film Development Council of the Philippines nga madamo nga mga Ilonggo film ang makita sa patag sang filmmaking sa Pilipinas.
Sa Good Morning Philippines program, ginpahayag ni Kevin Piamonte, film maker, nga mangin palaagyan ang Iloilo Summer Arts Festival sa pagtib-ong sang Ilonggo film nga nagapakita sang maragtas sang Iloilo.
Suno kay Piamonte, ang Visayas ang aktibo sa patag sang filmmaking rason nga kinahanglan ini nga mapadayon apang antes pa man sini, kinahanglan nga hatagan sang edukasyon kag training ang aspiring filmmakers.
May kaangtanan diri, ginpahayag ni Piamonte nga ang Iloilo Summer Arts Festival ang patigayunon sa Abril 30 tubtub Mayo 1 kun sa diin manngin tema sang film competition amo ang “Locally interesting, globally appealing”.
Ang deadline sa pagpasa sang application ang natalana sa Marso 25 samtang sa Abril 5 naman patigayunon ang work shops.
Sa Abril 18-19, patigayunon ang Trailer pitch competition kun sa diin ang magadaug ang pagahatagan sang incentives nga pagagastuhon sa paghimo sang 20-minuter film nga amo ang igapakita sa Charter Day celebration.
Natalana naman sa Mayo 8-15 ang screening sang Ilonggo Films nga naka-angkon sang pagkilala sa patag sang national kag international scene.
Daku ang potensyal sang mga Ilonggo nga magpangibabaw sa patag sang musika rason nga ginlunsyar sang Iloilo City Government ang Iloilo Summer Arts Festival.
Sa Good Morning Philippines program, ginpahayag ni PG Zoluaga, songwriter/ mucisian, nga ang Iloilo Summer Arts Festival ang isa ka paagi sa pagtukib sang aspiring musicians nga mahimo ipabugal sa pungsod lakip na sa bug-os nga kalibutan.
Suno kay Zoluaga, madamo nga singer ukon musician sa Pilipinas ang halin sa syudad ukon probinsya sang Iloilo.
Ginpahayag ni Zoluaga nga sa Iloilo Summer Arts Festival sa Abril 30 tubtub Mayo 1, may yara sang asud-asud nga mga aktibidad nga patigayunon kun sa diin masaksihan ang performances sang mga banda kag solo artist.
May kaangtanan diri, may yara man sang patigayunon nga work shop sa Iloilo Museum of Contemporary Art para sa aspiring musicians kun sa diin may mga dinapit nga bisita nga magatambong.
Ang workshop ang bukas kag libre para sa tanan nga may hilig sa musika.
Samtang, plano naman sang Iloilo City Government nga dal-on sa pampubliko nga lugar ang pagpatigayon sang theater (play).
Suno kay Eric Divinagracia, eksperto sa patag sang theater, ginaduso nga patigayunon ang play sa mga pampubliko nga lugar.
Ini bangud nga ang mga makalantaw lamang sang play amo ang may yara sang inugbakal sang ticket.
Sa bulig sang practitioners kag theater groups, ginaduso nga magpatigayon sang play sa barangay gym ukon sa mga merkado publiko agud nga madamo ang makakita.
