ILOILO CITY – Proud product sang West Visayas State University ang Ilonggo filmmaker nga nag-direct sang award-winning film sa 48th Metro Manila Film Festival nga “Nanahimik Ang Gabi.”
Ini amo si Shugo Praico, residente sang La Paz, Iloilo City kag nag-graduate sa West Visayas State University sa kurso nga Mass Communications sang 1998.
Ang romance thriller movie nga “Nanahimik Ang Gabi” ang nakakuha sang mga awards nga Best Musical Score, Best Production Design, Best Supporting Actor, Best Actor kag 3rd Best Picture.
Nominado man ini sa mga masunod: Best Screenplay, Best Director, Best Actress, Best Editing, Best Sound, Best Cinematography, Best Visual Effects kag Gender Sensitivity.
Sa interview sang Bombo Radyo kay Praico, iya ginpahayag nga inspirasyon niya sa film making ang mga naagyan niya nga nanari-sari nga production classes sang siya ang kolehiyo pa lamang.
Matapos nga naka-graduate, nagpadulong ini sa Manila kag nagtrabaho bilang script writer sa sulod sang malawig nga tuig kag sang nagligad nga lima ka tuig, gintukod niya upod sa iban pa nga mga direktor ang ila subong production company.
Ini ang una nga pelikula nga ginhimo niya apang nangin director na siya sang series nga Bag Man kag kag Betcin nga lunsay nakakuha sang citation sa Asian Academy Awards.
Subong nga halos nagbalik na sa normal ang tanan kag bukas na ang mga sinehan, nalipay si Praico nga liwat na naman nga nagbalik ang excitement sang tawo nga maglantaw sang mga pelikula.
