Gina-engganyo sang mga Ilonggo filmmakers ang publiko nga suportahan ang mga lokal nga pelikula.
Ang pelikula ang nangin kabahin na sang entertainment industry sa madugay na nga tion.
Nagahatag ini sang dako nga impact sa mga tawo sa diin samtang nagadugay kag nagalakat ang oras, naga-evolve kag nagabag-o ang pelikula.
Sa interview sang Bombo Radyo kay Reymundo Salao, isa sa mga filmmakers, iya ginpahayag nga ang pelikula ang nagapakita sang kultura nga may yara ang mga Filipino.
Ini man ang nagareflect sa sosyudad nga may yara ang Pilipinas.
Samtang suno naman kay Allen Rivera Galindo, isa ang Iloilo sa may yara sang pinakamabakod nga komunidad sang mga filmmakers.
Ini bangud nga nagabuligay kag naga-ugyon ang mga directors, scriptwriters, talents kag iban pa nga kabahin sang pelikula.
Tuman man ang pagpasalamat ni Galindo nga sa Western Visayas, may yara sang regional festival sang mga pelikula sa diin ini ang nagahatag sang “venue” sa mga filmmakers nga ipakita ang ila nga abilidad.
Ang paghimo sang pelikula pahayag sang natungdan ang pamaagi man nga engganyuhon ang mga kabataan nga mag-upod sa ila nga kawsa.
Pahayag naman ni Lodrigo “Lodi” Basco Jr., myembro sang Guimbal Ifilm Society, dako na ang pagbag-o sang kalidad sang pelikula sadto kag subong.
Apisar nga madugay na nga nagahimo sang pelikula si Basco, nagapartisipar ini sa gihapon sa mga workshops sa diin gina-giyahan kag gina-monitor sila sang local government unit sang Guimbal.
Nahibaluan nga ang nasambit nga banwa ang nagapatigayon sang tuigan nga Film Festival.
Sa pihak sang COVID-19 pandemic, padayon kag aktibo sa gihapon ang mga filmmakers sa paghimo sang pelikula sa diin ginasunod sang maayo ang minimum health protocols.
