ILOILO CITY – Daku nga pagpanghangkat para sa mga coach sa 2019 University Games nga maghanas sang local players nga magatiglawas sa pungsod sa mas dalagku nga mga kompetisyon.
Sa interview sang Bombo Radyo kay Mr. Dan Padernal, Head Coach sang National University Football Team kag tumandok sang Brgy. Cabugao Sur, Sta. Barbara, Iloilo, iya ginpahayag nga ang pagpakigbahin sa mga sporting event kaangay sang University Games ang makabulig sa mga kabataan nga matudlu-an sang mga ideya kag estilo sang mga players gikan sa nagkalain-lain nga lugar.
Suno kay Padernal, kalabanan sa players sang Pilipinas sa football ang half-breed na, apang wala ini nagakahulugan nga wala na sang kahigayunan ang mga Ilonggo nga magpakigbahin sa nasambit nga sports.
Ginpahayag ni Padernal nga kun binag-binagon, makabig nga sagad sa football ang mga player gikan sa Iloilo, ilabi na sa Sta. Barbara kag Barotac.
Indi makatingalahan suno sa natungdan nga mangin balantayan gid ang football sa University Games subong nga tuig bangud nga may yara sang Ilonggo players nga magahampang.
Nahibaluan nga antes pa man nangin coach sang National University, si Padernal ang isa ka licensed football coach kag naghanas sa elementary kag high school students sa Iloilo nga nakahampang sa Palarong Pambansa.
