DAVAO CITY – Nagalaum ang Ilonggo Gold Medalist nga si Vice Jatyson Buhayan sang Carles, Iloilo nga makakuha liwat sang medalya sa Palarong Pambansa 2019 sa Davao City.
Natalana subong nga adlaw nga magahampang sa 400-M run Secondary boys si Buhayan.
Una na nga nakakuha sang Ilonggo athlete ang Gold Medal sa100-M run kag ginlutos ang defending champion nga delegado sang National Capital Region (NCR).
Sa exclusive interview sang Bombo Radyo kay Buhayan, iya ginpahayag nga wala gid siya naglaum nga magpangibabaw gikan sa iya mga kasumpong.
Tuman naman ang pagpasalamat sang natungdan sa suporta sang tanan nga Ilonggo ilabi na sang iya pamilya.
Samtang, suno naman kay Coach Eliseo Navarro, makabig nga ‘crucial’ ang performance sang mga atleta sa 100-M run apang ginpamatud-an ni Buhayan nga siya ang pinakamadasig sa tanan.
Bilang Coach suno kay Navarro, tuman ang iya kalipay bangud nga sa iya nga pagserbe nga coach, ini ang labing una nga kahigayunan nga nakakuha sang Gold ang Western Visayas sa nasambit nga sports.
May yara naman sang igahatag nga cash incentives ang Iloilo Provincial Government para sa mga atleta nga nakakuha sang medalya sa Palarong Pambansa.
