ILOILO – Dapat nga ihayag sa publiko ang geotechnical study natuhoy sa mga fault lines nga mahimo makit-an sa ginatindugan sang Jalaur Dam Project sa Calinog, Iloilo.
Ini ang opinyon ni Engr. Edgar Manaay, isa ka Ilonggo hydrologist, kasunod sang kahangawa sang publiko sa posible epekto sang nagasunod-sunod nga linog sa Mindanao sa duta malapit sa Jalaur Dam.
Sa interview sang Bombo Radyo kay Engr. Manaay, iya ginpahayag nga dapat ipakita sang Pacific Consultant sa publiko kon ano ang ila pagpanalawsaw natuhoy sa lugar sa Calinog, kon bala estable ini, kag kon may tubig, indi matunaw ukon mag-collapse ang duta.
Nahibaluan nga ang Pacific Consultant amo ang nagapanguna sa amo nga geotechnical study, sa diin ginapondohan ini sang Korean Firm.
Suno kay Engr. Manaay, may kinamatarong ang publiko sa paghibalo sang dugang kag ang pagtib-ong sini nga impormasyon ang dapat man mangin kawsa sang media.
Sa subong, dugang ni Engr. Manaay, dapat nga dulaon ang anuman nga pagkahangawa bangud wala pa sang “extensive research” kag “accurate study” ang Philippine Institute of Volcanology and Seismology ukon PHIVOLCS natuhoy sa active fault lines.
Suno kay Engr. Manaay, “inferred” lamang ukon gin-base sa aerial survey ang amo nga pagpahayag sang mga existence sang fault lines sa Panay.
Iya ginpahayag nga indi ini sayantipiko, kag indi matumod kon diin gid ini makita.
