MANILA – No choice ang mga Ilonggo nga Locally Stranded Individual kundi maghulat sang ila flight papauli sa Iloilo matapos nga wala nadayon ang natalana nga flight kahapon, Setyembre 18.
Sa interview sang Bombo Radyo kay Stephen Lagaña sang Balasan, Iloilo, iya ginpahayag nga wala nadayon ang iya nga pagpauli bangud nga wala nalakip sa manifesto ang iya pangalan.
Suno kay Lagaña, ginpanugyan sang airline company nga ipa-rebook na lang sa Oktubre 9 ang flight apisar nga kumpleto pa ang iya papeles.
Ginpahayag ni Lagaña nga prayoridad sang airline company ang mga residente sang Iloilo City.
Ang ginaproblemahan sang natungdan amo ang iya mangin kahimtangan tubtub nga makapauli sa Oktubre 9.
Suno naman sa Ilongga nga nagpakilala lang sa pangalan nga Sonia sang Dingle, Iloilo, sang Hunyo pa kun tani ang iya nga pagpauli apang masami lang ginakansela ang flight.
Ginpahayag ni Sonia nga wala nalakip ang iya pangalan sa manifesto para sa Setptember 18 nga flight papauli sa Iloilo rason nga iya ini nga ginpa-rebook sa Oktubre 15.
Kasubong sa iban nga Locally Stranded Individual, ginpahayag sang natungdan nga kumpleto man ang iya dokumento.
