ILOILO CITY – Nagbiyahe na padulong sa Indonesia ang Ilonggo mixed martial arts (MMA) champion nga si Rene “The Challenger” Catalan nga tumandok sang Sta. Barbara, Iloilo.
Natalana nga atubangan ni Catalan si Xuewen Peng sang China sa maabot nga Sabado, Enero 20, sa ONE Championship: Kings of Courage nga patigayunon sa Jakarta Convention Center.
Nagalaum si Catalan nga mahatagan sang dungog ang mga Ilonggo kag ang bug-os nga pungsod.
Suno sa Ilonggo fighter nga sadto kabahin sang Philippine national team, preparado na siya physically, mentally kag spiritually.
Ginakabig sang 39-anyos nga si Catalan nga bentaha ang iya edad kag eksperyensya batok sa 21-anyos nga si Peng.
Apang gin-ako nga indi basta-basta nga kasumpong si Peng bangud kaangay sang world champion ang kalibre sini.
Nahibaluan nga wrestling national champion sang China si Peng.
Magluwas diri suno kay Catalan, kilala ang China nga pinakdisiplinado nga mga atleta.
