ILOILO – ‘Loud and proud’ ang isa ka Ilonggo matapos nag-graduate sa United States Military Academy ukon mas kilala nga West Point.
Ini amo si 2nd Lieutenant Allen Francis Estampador Dasilao, 23, tumadok sang Barangay Don T. Lutero Center, Janiuay, Iloilo.
Nagtapos ini sang iya elementary bilang kabahin sang Special Science Class sa Janiuay Pilot Elementary School kag sekondarya nga isa man sa Special Science Class sa Iloilo National High School.
Sa interview sang Bombo Radyo kay Dasilao, iya ginpahayag nga bangud luyag nila nga mabalanse ang iya academics kag physical well-being, nagkuha siya sang entrance examination sa Philippine Military Academy kag maswerte nga nakapasar.
Sang manug-2nd year na ini sa akademya, gintanyagan ini sang sang scholarship bilang kabahin sang ila foreign service academy program sa diin ginpadala ini sa West Point.
Subong nga tuig, nakatapos na si Dasilao sa West Point sa diin personal nga nagtambong ang iya mga ginikanan sa iya graduation.
Ginpahayag sini nga dako nga kadungganan para sa iya nga makatapos sa premier military school sa Amerika.
Si Dasilao naman ang ika-81 nga Filipino nga nagtapos sa West Point.
Sa subong, plano naman sini nga magsulod sa Philippine Army.
