Gin-appoint ni Pope Francis ang isa ka pari nga tumandok sang Janiuay, Iloilo nga si Father Romeo Duetao Convocar bilang bag-o nga obispo sang Diocese of Chalan Kanoa sa Northern Mariana Islands.
Ang pagpili sa iya bilang bishop sang Chalan Kanoa ang gin-anunsyo sang Vatican udto sa Roma kag alas syete kagab-i oras naman sa Pilipinas.
Sa Saipan naman, si former Manila archbishop Luis Antonio Cardinal Tagle ang nagpahibalo sang balita kadungan sang 40th anniversary sang Diocese of Chalan Kanoa. Ini bangud si Tagle ang highest ranking Filipino sa Catholic Church nga subong pro-prefect sang Dicastery for Evangelization sa Vatican.
Ang Diocese of Chalan Kanoa ang naga-cover sang bilog nga Northern Mariana Islands nga teritoryo sang United States sa western Pacific Ocean.
90% sang populasyon sini ang makit-an sa isla sang Saipan kun sa diin mga Pinoy ang dominant ethnic group. Sa pagkamatuod, yara sa 19,000 Filipinos ang 41% sang mga tawo sa Saipan.
Nabun-ag si Father Concovar sa Janiuay, Iloilo sang April 13, 1970 kag antes ang appointment bilang bishop, siya ang parish priest sang Blessed Diego Luis de San Vitores sa Tamuning, Guam.
Nag-eskwela siya sa high school kag nagtuon sang philosophy sa Saint Joseph Seminary sa Dumaguete City kag gintapos ang iya theological studies sa Saint Joseph Regional Seminary sa Jaro, Iloilo City.
Na-ordenahan siya bilang pari sang Septyembre 17, 1996.
Nakaserbe siya sa Military Ordinariate of the Philippines nga amo ang nagahatag sang serbisyo sa men and women in uniform. Nangin military chaplain siya sang Armed Forces of the Philippines (AFP) nga may rank nga captain. Nakaserbe man siya sa AFP Central Command nga amo ang Cavite Naval Base nga military base sa Fort Bonifacio.
Sang ulihi, ginsaylo siya sa Archdiocese of Agaña sa Guam kun sa diin lain-lain ang iya nangin posisyon tubtub sang 2012.
Nangin vicar general man siya ukon right-hand ni anay-archbishop Michael Jude Byrnes sa Agaña kag nangin apostolic administrator ukon caretaker sang archdiocese sang nag-resign si Byrnes sang 2023.
Kabahin lamang si Father Convocar sa nagadamo nga Filipino priests nga gin-appoint sang Santo Papa bilang Catholic Bishops sa nagkalain-lain nga parte sang kalibutan.
Base sa ginbalhag sang Catholic Bishops Conference of the Philippines, si Father Convocar ang ikatatlo nga obispo sa Chalan Kanoa nga naestablisar bilang diocese sadtong 1984.#
