𝗜𝗟𝗢𝗜𝗟𝗢 – Napun-an sang pagpasalamat ang isa ka Ilonggo nga si Father Romeo Duetao Convocar matapos gin-appoint ni Pope Francis bilang bag-o nga obispo sang Diocese of Chalan Kanoa sa Northern Mariana Islands.
Ang pagpili sa iya bilang bishop sang Chalan Kanoa ang gin-anunsyo sang Vatican sa Roma.
Sa Saipan naman, si His Eminence, Luis Antonio Gokim Cardinal Tagle, ang Pro-Prefect ng Dicastery for Evangelization ang nagpahibalo sang balita kadungan sang 40th anniversary sang Diocese of Chalan Kanoa.
Ini bangud si Tagle ang highest ranking Filipino sa Catholic Church nga subong pro-prefect sang Dicastery for Evangelization sa Vatican.
Sa interview sang Bombo Radyo kay Convocar, iya ginpahayag nga isa ka dako nga kadungganan ang pagsalig nga ginhatag sa iya sang Santo Papa.
Suno kay Convocar, kaupod sang bag-o sini nga posisyon ang dako man nga responsibilidad.
Ang amay ni Bishop-elect Convocar ang tumadok sang Janiuay, Iloilo samtang ang iloy naman sini ang taga Zarraga, Iloilo.
Nag-eskwela siya sa high school kag nagtuon sang philosophy sa Saint Joseph Seminary sa Dumaguete City kag gintapos ang iya theological studies sa Saint Joseph Regional Seminary sa Jaro, Iloilo City.
Na-ordenahan siya bilang pari sang Septyembre 17, 1996.
Nakaserbe siya sa Military Ordinariate of the Philippines nga amo ang nagahatag sang serbisyo sa men and women in uniform.
Nangin military chaplain siya sang Philippine Navy nga may rank nga captain.
Nakaserbe man siya sa AFP Central Command nga amo ang Cavite Naval Base nga military base sa Fort Bonifacio.
Sang ulihi, ginsaylo siya sa Archdiocese of Agaña sa Guam kun sa diin lain-lain ang iya nangin posisyon tubtub sang 2012.
