ILOILO CITY – Tuman ang kasubo sang pamilya sang Ilonggo nga suldado nga napatay sa engkuwentro sa Marawi City batok sa Maute group.
Sa interview sang Bombo Radyo Iloilo, ginpahayag ni Simeon Plares Sr., amay ni Sgt. Simeon Plares Jr. nga kalakip sa 13 ka mga miyembro sang Philippine Marines nga napatay sa bakbakan sa militante nga grupo, sang ginsulod sang mga ini ang Barangay Lilod Madaya.
Suno kay Ginoong Plares, ulihi na ginpahibalo sa ila ang ginadangatan sang iya bata bangud nga nagabatyag sila nga mag-asawa sang hypertension.
Apang antis nabal-an, may panagupnop na ini nga may malain nga natabo sa iya anak.
Si Sgt. Plares ang tumandok sang Barangay Ubang, Pototan, Iloilo kag nagaserbe nga breadwinner sang iya pamilya.
Tuig 2004 sang ini ang nagasulod sa Philippine Marines.
Ini ang nagpatapos eskwela sa ila agot nga manghod kag ginpatindugan man sini sang balay ang mga ginikanan.
Matapos ang duha ka tuig nga pagsulod sa nagkalain-lain nga trabaho pagkatapos mag-graduate sa college, nagdesisyon ini nga magsulod sa Philippine Marines.