ILOILO CITY – Gindul-ong na sa iya katapusan nga palahuwayan ang Ilonggo nga suldado nga napatay sa engkwentro sa Maute group sa Marawi City.
Ini amu si Private First Class Anthony Capulot sang Igcadios, Leon, Iloilo.
Suno kay Corporal John Peter Capulot, magulang sang suldado nga napatay, nabaton na sang ila nga pamilya ang natabo kag maga-move on na lang sila.
Ginpahayag sini nga kuntento na sila sa bulig nga ginhatag sang Philippine Army sa kamatayon sang iya manghod.
Antis ginlubong, ginhatagan ini sang 21-gun salute.
Ginhatagan man ini sang military merit award nga ginahatag sa mga suldado nga napatay sa ngalan sang serbisyo.
Nahibaulan nga si PFC Anthony Capulot ang napatay sa paghulog sang bomba sang Philippine Air Force sa ila nga ginahamtangan sa Marawi.