ILOILO – Tuman ang pagpasalamat sang isa ka Ilonggo matapos nangin Top 7 sa Philippine Military Academy ‘Bagong Sinag’ Class of 2024.
Ini amo si Cadet First Class Floyd Niño Arthur Roxas, 23, residente sang Barangay Cagamutan Norte, Leganes, Iloilo.
Si Roxas ang subang sa tatlo ka mga anak nanday late Arturo Ligasan Roxas sang Passi City kag si Engr. Linosita Golbeque Roxas sang Leganes, Iloilo.
Ini ang nagapang-pito sa 278 ka mga kadete nga nagtapos sa akademya.
Sa interview sang Bombo Radyo kay Roxas, sang una, handom sini nga mangin isa ka piloto bangud luyag sini nga makalagaw sa iban nga lugar.
Apang bangud yara na sa ila dugo ang pagka-militar, nagsulod ini sa akademya.
Wala naman nangin mahapos ang iya kabuhi sa akademya bangud isa siya ka ‘pandemic baby’ sa diin kinahanglan niya nga mag-adjust sa health protocols, online kag modular learning.
Suno kay Roxas, sang 2nd year siya sa akademya, nagtaliwan ang iya amay bangud sa balatian.
Apang sa pihak sang sini nga pagtilaw sa kabuhi, nagpanginguha si Roxas agud makatapos sa pagtuon.
Sa iya pag-graduate, ginbaton sini ang Information Technology Plaque, Department of Leadership Plaque, kag ang Association of Generals and Flag Officers (AGFO) Award.
Natalana man ini nga magsulod sa Philippine Navy.
