UAE – Nagalaum ang Ilonggo nurse sa United Arab Emirates nga mangin madinalag-on lang ang ginapatigayon nga clinical trial sa bakuna batok sa COVID-19.
Sa exclusive interview sang Bombo Radyo kay Ramon Francisco Sonico, isa sa mga nag-volunteer agud mangin human subject sang clinical trial sang COVID-19 vaccine, iya ginpahayag nga ginabanta nga 45,000 ang nagpasa sang application paagi sa online apang 15,000 ka vaccine lamang ang available.
Suno kay Sonico, bilang nurse, nag-umpisa ang iya career sa pag-volunteer tubtub nga nakatrabaho sa United Arab Emirates kag nahatagan sang kahigayunan nga mangin human subject sa ginapatigayon nga pagtuon.
Ginpahayag ni Sonico nga antes siya nagdesisyon, iya anay nga ginhibalo ang tuhoy sa bakuna agud nga indi man mabutang sa peligro ang iya kabuhi.
Ang bug-os nga pagsalig sa UAE government suno kay Sonico ang nagtulod sa iya agud magpadayon sa pag-volunteer bilang human trial apang apisar sini, indi niya malikawan nga magkabalaka sa posible matabo rason nga ulihi na lang nakahibalo ang iya pamilya sa Sta. Barbara, Iloilo.
Isa pa gid sa nagpabaskog sang iya balatyagon amo nga ang pinuno mismo sang Abu Dhabi Health Department nga si Sheikh Abdullah bin Mohammed Al Hamed ang isa man sa nag-volunteer agud mangin human subject sang bakuna nga gin-develop sang China-based company paagi sa partnership sa UAE government.
Kabahin sa proseso nga iya gin-agyan suno sa natungdan amo ang pagpaidalom sa COVID-19 test ilabi pa nga ang bakuna ang applicable lamang sa mga wala pa naka-agi sang COVID-19, pag-check sang medical history kag vital signs kag kun makapasar sa screening, diri na matabo ang pag-inject sang bakuna nga nagaserbe nga antibodies batok sa virus.
Pagkatapos sang injection, ginapanugyan ang 7-day monitoring sang body temperature kag pagkatapos sini, hulaton ang 21 ka adlaw antes ang ika-duha nga vaccine shot kag magalawig sang isa ka tuig ang monitoring sang UAE government sa tanan nga human subject.
Gin-athag sang Ilonggo nurse nga wala sang bayad ang pagrisgo niya sang kaugalingon bangud nga ang impoortante amo nga mangin madinalag-on ang clinical trial agud nga indi na madugangan ang COVID-19 patients sa bug-os nga kalibutan.
