May promising data nga nakit-an ang mga eksperto sa antiviral properties sang tawa-tawa bilang potential treatment sa mild tubtob moderate nga mga kaso sang COVID-19.
Ang project team sa amo nga clinical trial ang ginapangunahan ni Dr. Philip Ian Padilla, vice chancellor for academic affairs sang University of the Philippines (UP) Visayas kag isa ka public health expert.
Sa interview sang Bombo Radyo kay Padilla, iya ginpahayag nga yara na subong sa Phase 2 ang ginapatigayon nga clinical trial sa nasambit nga herbal medicine.
68 ka mga pasyente ang na-recruit na nga magpartisipar sa randomized controlled clinical trial sa efficacy kag safety sang tawa-tawa extract.
Suno kay Padilla, sa Bacolod City kag Negros Occidental naghalin ang mga volunteers para sa amo nga pagtuon.
Target sang 11-month study nga makatipon sang 280 participants gani nga nagapadayon pa subong ang pagpangita sang mga volunteers ukon mga pasyente nga may mild tubtob moderate nga COVID-19 cases.
Ginalauman nga Septyembre subong nga tuig matapos ang amo nga pagtuon.
Una na nga gin-aprubahan ang tawa-tawa bilang health supplement para sa Dengue.
Funded sang Department of Science and Technology (DOST) ang research kag development agud nga makilala kag maaprubahan ang tawa-tawa bilang potential treatment sa COVID-19.
