Sang tuig 2018, halos naalimunaw na ang madugay na nga handum ni John Marvin Marañon nga mangin isa ka abogado kaangay sang iya amay.
Nakaangkon siya sang avascular necrosis, isa ka kondisyon nga rason kun ngaa nangin bedridden siya sa sulod sang isa ka tuig.
“New Year sadto sang 2018, while nagaselebrar ang iban, ako ya nagasininggit sa kasakit,” pahayag sini. Gindugang sini nga amo ini ang rason sang iya pag-untat sa law school. “Bisan ang hangin… bisan ang slightest touch, nagasakit gid ang lawas ko,” pahayag pa ni John.
Dugang niya, duha ka tuig niya nga ginpunggan pati ang pag-ubo kag sip-on bangud tuman ka sensitibo ang iya lawas.
Sa bulig sang iya iloy nga isa ka nurse, iya amay, iya pamilya, iya mga abyan, kag hugot nga pagtuo sa Ginuo, nakabalik siya sa pag-eskwela sa law school sang tion nga may pandemya — tion nga nag-shift online ang mga klase.
Pagbalik sang face-to-face classes, naggamit siya sang walker kag nagtinguha gid nga makalakat kaangay sa iya classmates.
Bisan ano ka budlay kag bisan sang pisikal, mental, kag emosyonal nga mga pagpanghangkat, amat-amat sini nga ginlab-ot ang iya nagpahuway nga handum.
Sini nga 2024, isa siya sa nakapasar sa Bar exams.
“Never give up on your dreams. Never lose hope. No disability nor illness nor problem can hinder a determined person in his quest for excellence,” pagpakigbahin pa sang tumandok sang Leganes, Iloilo nga produkto sang Central Philippine University (CPU).
“Cling to the Lord because the Lord will give you the strength when all of your strength is gone,” dugang sini sa interview sa Good Morning Philippines sa Bombo Radyo Iloilo.
Ginpahayag sini nga antes siya mag-practice sa iya nga propesyon, tinguhaan sini anay nga maka-recover matapos nagpaidalom sa hip replacement surgery.#
