Eksklusibo nga napakig-angutan sang Bombo Radyo ang pamilya sang isa ka Ilonggo Seaman nga si Jujerick Layer nga isa ka crew sa MV Trisha Kerstin 3 nga amo ang naglugdang nga roro vessel sa bahin sang baybayon sang Basilan.
Sa interview sang Bombo Radyo kay Jose Pendioday, Lolo sang nasambit nga survivor, iya ginpahayag nga tuman gid ang ila nga kakulba sang ila nga nabalitaan nga naglugdang ang ginsakyan nga barko sang iya nga apo.
Suno kay Pendioday, wala siya makakaun sang mayo sa pagpaminsar kun ano na ang natabo sa iya apo.
Dako man ang iya nga pagpasalamat sa Bombo Radyo bangud nga diri nila nakit-an nga nakasurvive si Jujerick .
Matapos man nila nga mabalitaan nga safe ang iya apo, naisturya naman nila ini kag ginsaysay sini kun ano ang natabo sa iya.
Nagpahayag man si Jujerick sa iya lolo nga isa man sa kaupod sini nga Ilonggo kag kaangay man iya nga apprentice ang nagtaliwan sa nasambit nga insidente.
Apang wala naman sang iban pa nga detalye nga ginsaysay ang Ilonggo survivor bangud man nga nagarecover pa ini sa natabo sa ila barko.
Samtang, nagpaabot naman sang mensahe ang lolo ni Jujerick sa iya nga suno sa iya nga nagalain ang buot sini sa natabo sa apo apang iya man ini istoryahon kun mangin okay na ang kahimtangan sini.
Yari ang mensahe sang lolo ni Jujerick sa iya
Nakamuno naman sang una si Jujerick sa ila nga medyo daan na ang barko kun sa diin ini naga-apprentice, apang nagalaom ang pamilya nga kuntani maimbestigahan ang natabo agud mahatagan sang hustisya ang mga tawo nga napatay sa nasambit nga trahedya.
Words by: Bombo Joedel Nollaga
