ILOILO CITY-Magasugod na subong nga semana ang pagtalakay sang Kongreso sa budget sang tagsa ka departamento sang gobyerno sa idalom sang P4.5 trillion nga 2021 budget.
Sa interview sang Bombo Radyo kay Iloilo 3rd District Representative Lorenz Defensor, iya ginpahayag nga tinguhaan nila sa kongreso nga mapadasig ang pagpasar sa budget kag wala sang matabo nga delay.
Suno kay Defensor, sa pagpasar sa budget nasandig ang pagsalig sang tawo bangud diri nagadepende ang mangin palaabuton sang ekonomiya kag sang pumuluyo ilabi pa nga padayon nga ginaatubang sang Pilipinas ang COVID-19 pandemic.
Sa idalom sang proposed 2021 national budget, yari ang top 10 nga departamento nga gintigan-an sang pinakadako nga pondo:
1.Department of Education:P754.4 B
2.Department of Public Works and Highways:P667.3 B
3Department of Interior and Local Government: P246.1 B
4.Department of National Defense: P209.1 B
5.Department of Health: P203.1 B
6.Department of Social Welfare and Development: P171.2 B
7.Department of Transportation: P143.6 B
8.Department of Agriculture: P66.4 B
9.Judiciary:P43.5 B
10.Department of Labor and Employment: P27. 5 B
Gin-ako naman sang mamalidha nga indi ini kumporme sa P66. 4 B nga gintigana para sa Department of Agriculture kag P27. 5 B para sa Department of Labor and Employment.
Suno sa natungdan, tama ka gamay ang alokasyon para sa nasambit nga mga ahensya ilabi na subong nga ginaatubang sang pungsod ang isyu sa food security kag madamo man ang nadulaan sang trabaho.
May kaangtanan naman sa isyu sa Philippine Health Insurance Corporation ukon PhilHealth, ginpahayag ni Defensor nga apisar nabutang ini sa kontrobersya bangud sa korapsyon sa ahensya, katungdanan sa gihapon sang gobyerno nga pondohan ini.
Apang, suno kay Defensor, indi man dapat malipatan sang gobyerno ang obligasyon sini nga pasakaan sang kaso ang mga tawo nga responsable sa pagkadula sang pondo sa PhilHealth.
