Ilonggo survivor sa Las Vegas massacre, nagpanumpa nga indi na maglantaw sang concerts bangud sa trauma

Kakugmat ang nabatyagan sang Ilongga survivor sa nagluntad nga masaker sa Las Vegas, Nevada kun sa diin 59 ang patay samtang masobra 500 ang pilason.
Suno kay Bombo Radyo international correspondent Mia Lastimoso sang Pavia, Iloilo kag karon masobra na isa ka tuig nga nabase sa Las Vegas bilang massage therapist kag part time real estate agent, natabuan nga yara siya sa concert grounds sang gab-i sang nagluntad ang insidente.
Bilog siya nga adlaw sa sulod sang simbahan sang ginhagad siya sang iya abyan nga magkadto sa venue sa diin na-late sila sa pag-abot kag imbes nga sa front row malapit sa stage, sa likod na lang sila nga bahin nagplastar.
Sa una nga pag-arak sang luthang, daw kaangay pa nga naga-enjoy ang mga tawo suno kay Lastimoso kag ginhuna-huna nga kabahin lang sang programa ang linupok apang sang nabinag-binag na sa ika-duha kag ika-tatlo nga pagbubo sang magazine, hungod nga ginpaulanan sang bala ang mga tumalambong, nag-umpisa na nga mag-panic ang mga ini.
Apisar kabahin sang prebelihiyo sang iya trabaho ang offer kaangay sang libre nga hotel kag plane ticket, nagpanumpa na gid ini nga indi na magkadto sa mga kaangay nga events ilabi na kun madamo sang tawo ang nagatambong.