ILOILO CITY – Nagpasundayag sang talento ang mga elementary kag high school Students gikan sa syudad kag probinsya sang Iloilo sa ginpatigayon nga ‘Tambor, Trumpa, Martsa, Musika’ sa Iloilo Freedom Grandstand.
Ang ‘Tambor, Trumpa, Martsa, Musika’ ang tuigan nga drum-and-lyre competition kag subong nga tuig, 13 ka eskwelahan sa elementarya kag lima sa sekondarya ang nagpasakop.
Sa elementarya, ang nagpasakop amo ang mga masunod:
- Napnapan Elementary School
- Alibango Central Elementary School
- Dingle Central Elementary School
- Mandurriao Elementary School
- Rizal Elementary School
- Esteban Juntado Elementary School
- Iloilo Central Elementary School
- San Jose Elementary School
- La Paz 1 Elementary School
- A. Montes 1 Elementary School
- Arevalo Elementary School
- Ta-al Elementary School
- Baluarte Elementary School
Sa sekondarya naman:
- Ramon Avanceña National High School
- Ajuy National High School
- Iloilo City National High School
- Tambaliza National High School
- Dingle National High School
Sa mensahe ni Iloilo City Lone District Congresswoman Julliene ‘Jam Jam’ Baronda, iya ginpahayag nga daku ang papel sang kabataan sa Dinagyang Festival 2020 bangud magluwas nga ini ang tion sa paghatag-dungog kay Sr. Sto Niño, tion man ini agud mapakita ang talento kag mapabugal ang kultura sang mga Ilonggo.
Ginpadayaw man ni Baronda ang pag ‘level up’ sang syudad ilabi na kun proyekto para sa kabataan ang pagahambalan.
Kaangot diri, ginpahibalo man ni Baronda nga may pagatukuron nga labing-una nga sports facility and training center sa Iloilo Jalandoni National High School.
SEGURIDAD.
Samtang, ginpasalig naman ni Police Major Francisco Paguia, hepe sang Police Station 1, nga hugot ang ginapatuman nga seguridad sa syudad ilabi na subong nga may ginapatigayon nga mga aktibidad.
Suno kay Paguia, ‘manageable’ ukon masarangan sang otoridad ang pagpatuman sang security measures sa pihak sang pagdinaguso sang tawo.
Ginpasalig man ni Paguia nga bastante ang police personnel nga nakadeploy sa palibot sang syudad.
