MANILA – Nagpabutyag sang pagkadismaya ang isa ka Ilonggo nga manunudlo nga stranded sa Metro Manila sa sulod na sang anum ka bulan.
Sa interview sang Bombo Radyo kay Joseph Evangelio sang Pototan, Iloilo, iya ginpahayag nga nagpadulong siya sa Metro Manila sang Pebrero agud magbulig sa iya utod nga manugbata.
Suno kay Evangelio, makapila na siya ka bes nga nagproseso sang requirements agud nga makapauli apang wala niya ini napuslan bangud nga makapila man ka bes nga ginkansela ang iya flight.
Ginpahayag ni Evangelio nga tuyo pa kun tani niya nga makahingagaw sa pagpauli sa Iloilo bangud sa iya trabaho bilang manunudlo sa Senior High School.
Sa pagkamatuod suno sa natungdan, amat-amat na nga nagaka-ubos ang iya budget bangud nga nagabayad pa siya sang renta sa boarding house magluwas sa pagbakal sang pagkaon kag iban pa nga kinahanglanon.
Maswerte pa siya suno kay Evangelio bangud nga may yara pa siya sang may ginatiniran nga boarding house apang ang iban nga Locally Stranded Individual ang nagapasimpalad na lang nga makasakay sa sweeper flights apang wala man nakapauli tubtub subong.
Amo na lang ang kalipay ni Evangelio bangud nga nakabaton na siya sang Certificate of Acceptance gikan sa Local Government Unit sang Pototan apang kadungan sini, ginpahibalo siya nga may yara sang moratorium sa bug-os nga Western Visayas.
Nahibalu-an nga sa Setyembre 11 na kun tani ang flight sang natungdan pauli sa Iloilo.
