ILOILO CITY – Ginpasidunggan sang Iloilo City Council ang Ilonggo Tony Award kag Grammy winner nga si Jhett Tolentino bangud sa ginhatag nga dungog sa siyudad sang Iloilo, matapos ginkilala sa patag sang sining kag musika.
Ang resolusyon ang ginpasar ni City Councilor Joshua Alim kag ginbaton sang amay ni Tolentino bangud nga sa Amerika sa karon ang Ilonggo artist.
Si Tolentino ang tumandok sang Zone 7, Calumpang, Molo, Iloilo City kag pinakauna nga Pinoy nga nagbaton sang Grammy Award para sa Best Musical Theater Album sang nagligad nga tuig, para sa Broadway show nga “The Color Purple”.
Nagserbe nga co-producer ni Tolentino sa amo nga show ang media giant nga si Oprah Winfrey.
Antes ang Grammy trophy, si Tolentino ang nakakuha sang Tony Award para sa Best Play sadtong 2013, Best Play Revival kag Best Musical sadtong 2014.
Ang Ilonggo artist ang ika-duha nga Pinoy nga nakabaton sang nasambit nga award matapos ang 22 ka tuig, sunod sa singer-actress kag international Broadway star nga si Lea Salonga.
Ginkilala man ini bilang Outstanding Filipino-American sa New York sadtong 2014.
Ginpasidunggan man ini sang Senado bilang isa sa mga Outstanding Young Men.
Si Tolentino ang nagtapos sang elementarya sa Calumpang Elementary School samtang nag-high school kag kolehiyo sa University of Iloilo kun sa diin siya nagtapos sang Bachelor of Science in Accounting.