ILOILO CITY – Napabilin sang Pinoy mixed martial arts (MMA) champion nga si Rene “The Challenger” Catalan ang winning streak, matapos ginlutos ang kasumpong nga si Peng Xue Wen sa ONE Championship: Kings of Courage sa Jakarta, Indonesia.
Ginpauntat sang referee sa ika-4:22 sang ika-duha nga round kag gindeklarar nga nagdaog si Catalan paagi sa technical knockout (TKO).
Wala makapalingkang sa 39-anyos nga Ilonggo fighter nga tumandok sang Barangay Lanag, Sta. Barbara, Iloilo ang wrestling champion nga si Peng.
Mabaskog nga mga sipa kag tapungol ang ginbuy-an ni Catalan kag wala ginhatagan sang tiyansa nga makabawi ang kontra.
Apang diutayan lang nga madulaan sang pangalibutan si Catalan sa una nga round matapos nga na-igo sang kontra ang iya kinatawo.
Apang wala ini makita sang referee suno kay Catalan kag gintinguhaan nga makabawi.
Nahibaluan nga sumugod 2016, wala pa sang piyerde ang multiple-time wushu world champion.
