Iloilo City – Ginpakigbahin sang isa ka Ilonggo Youth Leader nga anay biktima man sang bullying ang nangin kapalaran sa kamot sang bully.
Sa interview sang Bombo Radyo kay Rhodz Shelle Sadia Maat, iya ginpahayag nga nagapanago ini sa banyo agud magkaon sa kahadlok nga sunlugon ini.
Suno kay Maat, nagdako ini nga puno sang insecurity bangud sa padayon nga pag “body shame” sa iya nga nakaangkon sang madamo nga negatibo nga epekto.
Ginpahayag sang natungdan nga indi dapat magkahadlok nga sabton ang bully kun ikaw ang apektado bangud paagi sina, mahimo masalbar ang kaugalingon sa katalagman.
Nagpanugyan naman si Maat sa mga biktima sang bullying nga magsulat sang mga “notes” ukon pahanumdom sa tion nga kinahanglan sang kabaskog.
Sa masami ang nakaesperyensya sang bullying ang yara sa risgo sang depresyon, anxiety, kabudlay sa pagtulog, kag posible maga-resulta sa pagdrop-out sa eskwelahan.
Nahibaluan nga base sa Republic Act 10627 ukon ang Anti-Bullying Act of 2013 nga pirmado ni anay President Benigno Aquino III, ginamando sini ang tanan nga eskwelahan sa elementarya kag sekondarya nga mag-adopt sang school policies agud matapna ang bullying sa mga institusyon.
