Ilongo cuisine, bida sa welcome dinner para sa ASEAN delegates

ILOILO CITY – Bida ang Ilongo cuisine sa welcome dinner subong nga gab-i para sa ASEAN delegates.
Sa interview sang Bombo Radyo Iloilo, ginpahayag ni Junel Ann Divinagracia, executive director sang Local Organizing Committee sang ASEAN Ministerial meeting, wala sang problema sa mga pagkaon sang mga delegado nga magatambong sa welcome dinner, sa diin ginhandaan gid ini kag ipabugal ang mga lutong Ilonggo.
Magapatigayon man sang city tour ang mga delegado sang ASEAN meeting sa adlaw sang Huwebes.
Suno kay Divinagracia, patigayunon ang tour sa pagpamuno sang Department of Tourism.
Padulungan sang mga delegado ang Nelly’s Garden, Bahay na Bato kag sa Port San Pedro agud makita ang isla sang Guimaras.
Magluwas sini, pagabisitahon man sang mga delegates ang pila ka mga simbahan sa Iloilo kaangay sang Molo Church kag ang kaiping sini nga Molo Mansion agud nga makabakal sang pasalubong.